Merkezê Xeberan- Mamosta û wendekaranê Efrînî û Şehba dewa Wehşîye ra seba şermezarkerdişê qirkerdişê Til Rifatî yo ke dewleta tirke kerdibi ver bi merkezê leşkerî yê Rûsya rayîr ra şîyî.
Rayraşîyayîş de bi hawayêkê bêmabênî sloganê ''Bi peymana Tirkîya û Rûsya domanî yenê qetilkerdene'' ame vatene. Dima ke rayraşîyayîş resa merkezê Rûsya seba şehîdanê azadîye deqayêk rêzgirewtiş ame kerdene û eşkerayîya bi ziwanê kurdkî û erebkî hetê wendekaran Zeynep Lûlûl û Şehma Reşîd ra ameyî wendene.
Eşkerayîye de bale ameye antene ser ke dibistanî û cayê kaykerdişê domanan yenê bombavarnayene û ame vatene xeyalê ma yê ameyoxî yenê çinkerdene û bi desan domanê Efrînî û embazê ma bi destê dewleta tirke ya îşxalkere û cerganê aye yenê qetilkerdene."
Eşkerayîye de venga dewleta Rûsya ameye dayene ke wa heqanê domanan bipawa: "Ma venga pêro merdiman û rêxistinanê heqanê domanan danê ke dejê ma hîs bikê û qetilkerdişê domananê Efrînî sey ê domananê xo hîs bikê. Fotografanê domananê ke ameyî qetilkerdene bîyarê verê çimanê xo û wina bifikîrê."
Eşkerayîye ra dima çelengeko sîya hetê wendekaran ra verê merkezê leşkerî yê Rûsya de ame ronayene. Çalakîye bi sloganê ''Domanî mekişê'' qedîyay