Dîyarbekir de erdlerzê 6ê Sibata 2023î de 20 bînayî rijîyaybî û 316 tenî merdbî.
Pêroyî bajarî de 5 hezar û 459 bînayê xesarinî yê giranî estê û hetanî nika nînan ra 2 hezar û 738 bînayî ameyê rijnayîş.
Hetêk ra rijnayîşê bînayan dewam keno la hetêk ra zî bînayê ke yenê rijnayîş bêkontrol yenê rijnayîş û zêde tedbîrî nênê girewtiş.
Semtê Tesîslerî yê Dîyarbekirî de nê rojan de çend bînayê xesarinî yenê rijnayîş. La dorûverê bînayan de şerîdê asayîşî çin o û milet binê xirban ra, mîyanê toz û dûmanî ra şino-yeno. Bînayê sexlemî ke dorûverê xirban de mendê zî binê tozî de yê.
Şarê semtê Tesîslerî vano ke; "Tedbîrê profesyonelî nêameyê girewtiş. Dorûverê bînayan akerde yo û kepçeyî xebitîyenê. Ma nêeşkenê keye ra vejî teber û pencerayanê xo akerê. Ma tersenê homa nêkero çîke bibo kesêk. Xora zirarê nê tozî nêweşanê astimî rê esto. Ma pê maskeyan şinê keyeyanê xo û vejîyenê teber."
Şaro ke dorûverê xebata rijnayîşê bînayan de mîyanê tozî de mendo wazeno wa rijnayîşê bînayan ra dima semedê astengkerdişê tozî awdayîş bêro kerdiş û tedbîrê asayîşî bêrê girewtiş.
Zazakî news