Serokê Herêma Kurdistanê Nêçîrvan Barzanî îro li Hewlêrê pêşwazî li Parêzgarê Neynewa Necim Cibûrî kir û di civînê de behsa rewşa giştî ya Neynewa hat kirin û herwıha herdu alî hevnêrîn bûn ku divê rewşa Şingalê “di çarçova rêkeftina Hikûmeta Herêma Kurdistanê û Hikûmeta Federalî ya Iraqê de bê çareserkirin.”
Nêçîrvan Barzanî di civinê de piştevaniya Herêma Kurdistanê bo erk û hewlên Necim Cibûrî yên ji bo dabînkirina aramî û seqamgiriyê, çalakiyên aborî, karên mirovî û proseya avedankirinê derbirî.
Li gor daxuyaniya Serokatiya Herêma Kurdistanê, di civînê de rewşa giştî ya Neynewa, rewşa asayiş, xizmetguzarî, aborî, proseya avedankirinê, amadekariyên bo hilbijartinên Iraqê û peywendiyên Herêma Kurdistanê yên li gel parêzgeha Neynewa hatin gotûbêjkirin.
Nêçîrvan Barzanî tekezî li ser wê jî kir ku Herêma Kurdistanê li gel wê ye “koçberên navçeyê bi daxwaz û biryara xwe vegerin Mûsil û navçeyên din ên Neynewa, piştî ku aramî û seqamgirî li herêmên wan bicih dibe.”
Herwiha rewşa Şingalê jî di civînê de gotûbêj li ser hat kirin û herdu alî hevnêrîn bûn ku divê “rewşa Şingalê li gor rêkeftina Hikûmeta Herêma Kurdistanê û Hikûmeta Federalî ya Iraqê bê çareserkirin.”
Rewşa siyasî, gefên teror, kiryarên DAIŞê li navçeyê û çend pirsên din ên cihê girîngiya hevbeş, ji mijarên civînê bûn ku gotûbêj li ser hatin kirin.