Dîclê Anterî va, “Vîyartişê wextî ver betalbîyayîşê dewaya Mûsa Anterî sucê merdimatîye yo.”
Semedê dewaya Mûsa Anterî, şubeya Komeleya Heqanê Merdiman a Enqereyî de kombîyayîşê çapemeyîyî virazîya. Kombîyayîşî de lajê Mûsa Anterî Dîcle Anter, serekê Komeleya Heqanê Merdiman Ozturk Turkdogan û xeylê kesî ca girewtê.
‘Betalbîyayîşê dewa sucê merdimatîye yo’
Kombîyayîşî de lajê Mûsa Anterî Dîcle Anterî qisey kerd û ey va, “Eke faîlê nê cînayetî bivejîyê meydan, faîlê heme cinayetan vejîyenê meydan. No cînayet bi destê dewleta xorine ra ameyo kerdene. Hema zî Jîtem bi resmî nêameyo qebulkerdiş. Ronayoxê ci endamê ci estê la o bi xo çin o. Tewr peynî Ayhan Çerkinî zî tayê çîyê vatê la kes goş panêvist. Vîyartişê wextî ver betalbîyayîşê dewaya Mûsa Anterî sucê merdimatîye yo. Ganî nê dewayî wextî ver betal mebê. Ganî dewlete nê cînayetan biveja meydan.
La kesî de no cesaret çin o.” Ey ra dima Ozturk Turkdoxanî qisey kerd û va, “Ganî Tirkîya polîtîkayanê bêcezaverdişî biterikna û ganî komîsyonê Cigêrayîşanê Heqîqetan bêrê awankerdiş.”