Merkezê Xeberan- Deyîrbaze Îlkay Akkayaye hesabê xo yê medyaya sosyale ser o aşkere kerd ke kesêk 4 serrîyo ke aye bi mergî reyde tehdît keno. Akkayaye parekerdişê xo de veng da Wezîrîya Edaletî ke tedbîran bigîra.
Deyîrbaze Îlkay Akkayaye qalê çîyê ke cuyaya kerde û va:
“Seba ke sewbîna raybazêk nêmend ez nusena. Kesêk 4 serrî yo ke bi telefonî timî mi gêrena. Tehdîtkar cinî ya û problemê aye yê ciddî yê psîkolojîkî estî. Tehdîto ke 4 serrîyo dewam keno de tewr peynî konserêkê mi yê Edene betal bi.
Seba ke tedhdîtkare bêra tedawîkerdene mi hewl da ke ez xo biresna keyeyê aye, labelê keyeyê aye zî tu çîyêk nêkerd. Wexto ke ez Erziromî ra seba konser şîya Edene hêrişê wezîfedaran kerde û bi no qayde hedîse resa polîsan. Ez aye ra gerrekar nêbîya û mi tedawîya aye talep kerde.
Ganî na kese verê ke zirar bida kesêk, tedbîrî bêrî girewtene. Tehdîtkare mi û her kesî bi mergî reyde tehdît kena. Şahidan ra yewî nika gêraya û vata ke ez do to bikişa. Seba ke malumatê mi yê şexsî kewtî destê kesêka tehdîtkare zî ez rewşe protesto kena.”