Platformê Hêzanê Kede û Demokrasîyî yê Dêrsimî seba ke Unîversîteya Munzurî bi destê dewlete sey baregehê tarîqatan yeno şuxulnayene nêrazîbîyayîş ramojna û waşt ke wa Rektor Ubeyde Îpek wezîfeyî ra bêro girewtene.
Dêrsîmo ke bi serran o yeno waştene ke elewîyê ci bêrê asîmîlerdene de serranê peyênan de bi paştdayîşê dewlete xeylê tarîqatî binê nameyê komele, dezgehê paştdayîşî û waqifan de yenê ronayene. Platformê Hêzanê Kede û Demokrasîyî yê Dêrsimî Kuçeyê Sanatî de bi eşkerayîyêke protesto kerd.
Eşkerayî de ame vatene ke Unîversîteyî seba ke bajarî hetê sosyal, ekonomî, kulturî aver şirê yenê ronayene la Ûnîversîteya Munzîrî ronayîşê xo ra nata Dêrsimî ser o tesîro xirab keno û o îmajê tacîz û tecawuzî têna zirar unîversîte nêdano zirar dano bajarî zî.
Eşkerayî de ame îzah kerdene ke, Rektor Ubeyde Îpek wendekaranê xerîban ê welatanê cîya cîyayan sey Fas, Somalî, Sûrîye, Arabîstanê Suîdî, Afganstan, Sûdan, Yemen, Lubnan, Fîlîstîn, Ozekîstan, Turkmenîstanî unîversîte de ca keno ke unîversîteyî sey baregehê tarîqatan şuxulneno û ame waştene ke o cade wezîfeyî ra bêro dûrî fînayene.
Binê eşkerayîye de morê nê partî, sendîka, komele û dezgehan esto: SES, BES, EGİTİM SEN, TÜM BEL SEN, GENEL-İŞ, EMEP, HDP, ESP, CHP, İHD, DEDEF, PSAKD, DAD, DAM. Komeleya Paştdayîşê Cinîyan a Yenî Gunî, Komeleya Kultur û Xoza ya Dêrsimî û Înîsîyatîfê Sanatî yê Dêrsimî.