Merkezê Xeberan- Gulîstane Doku ra 9 rojîyo ke xeberêk nêna girewtene, embazê ci yê wendekarê zanîngehî zî bi sloganê ''Dêrsim bêveng mebe wayîrê Gulîstane bivejîye'' vejîyayî meydanan. Çalakîya wendekaran şewa bîne zî dewam kerde.
Wendekara Beşê Perwerdeyê Domanan ê Zanîngehê Munzurî Gulîstane Doku bi rojan o ke vînîbîyaye ya. Wendekarê cinîyî yê zanîngehî seba Gulîstane weriştî payan ser. Wendekarî bi sloganan, çepikan çalakîyanê xo rê dewam kenê û wazenê ke rewşa Gulîstane cade bêra eşkerakerdene.
Şewa bîne cayê mendişanê wendakaranê zanîngehî de wendekaranê cinîyan çalakîyêke viraşte.
Hema hema pêro cinîyan fenerî girewtî xo dest û slogananê ''Cinîye, Cuye, Azadîye'', ''Gulîstan Doku ça de ya?'', ''Dêrsim bêveng mebe, wayîrê Gulîstane bivejîye'' qîrayî.
Wendekarê camêrdan zî paştî daye çalakîye. Polîsan bi personelanê asayîşî xîret kerd ke çalakîya wendekaran asteng bikerê. Hemwelatijanê Dêrsimî zî keyeyanê xo ra bi tifikan, çepikan û sloganan paştî dayê çalakîya wendekaran.