Dêrsim de waqayê vîrusê Korona zêdîyenê û tedbîrî hînî qîm nêkenê. Şaristan de her roje tewr tay 25-45 kesî pê vîrusê Korona kewenê.
Sendîkaya Kedkaranê Xizmetê Komelkî û Weşîye (SES) ya Dêrsimî da zanayene ke mabênê 20-30ê teşrîna peyêne de şaristan de 270 waqayê vîrusê Korona yê neweyî ameyî tesbîtkerdene. Goreyê SESî Dêrsim de her roje 25-45 kesî pê Korona kewenê û 50 kedkarê weşîye zî nêweşê Korona yê.
Hemserekê Şubeyê Dêrsimî yê SESî Kahraman Yurukî pare kerd ke şaristan de tedbîrê vera Korona qîm nêkenê.
Yurukî rexne kerd ke heta ke rewşê înan giran nêbê nêweşî nêgêrîyenê nêweşxaneyan û qedexeyê tebervejîyayîşî zî çare nêkeno.
Yurukî vat: ''Rojan karker û kedkarî têkişt xebitîyenê. Selahîyetdarê ke rojan vera vîrusê Korona tedbîr nêgênê şewan do senî vîrus asteng bikerê? Ganî selahîyetdarî Yewîya Tabîban reyde pêvînayîşan bikerê û goreyê zanistî tedbîranê pîtan bigêrê.''