DEDEFî Îstanbul de vera kerdişanê seydwanîye yê Dêrsimî nêrazîbîyayîşê xo mojna û waşt ke seydwanîye bêra qedexekerdene.
Federasyonê Komeleyan ê Dêrsimî (DEDEF) vera kerdişanê seydwanîye yê Dêrsimî Rihtimê Kadikoyî de eşkerayîyêke daye. Eşkerayîye de pankarta bi nuşteyê ''Seydwanîye cînayet a, wa bêra qedexekerdene'' ameye akerdene û sloganî ameyî vatene.
Eşkerayîye hetê Sekreterê Pêroyî yê DEDEFî Hasan Şenî ra ameye wendene.
Şenî ard ziwan ke xozaya Dêrsimî şewatê daristanan û madenan ra dima nika zî tehlukeyê seydwanîye de têrî yo û vat: ''Dewijî nêeşkenê daristanan de bigêrê la seydwanan rê pêro îmkanî yenê pêşkêşkerdene. Seydwanî eşkenê şorê herêmanê qedexeyan û pezkovîyan û heywananê ma yê bînan bikişê. Ma wazenê gandarî Dêrsim de bi azadî biciwîyê. Selahîyetdarî qirkerdişê heywanan peygoş kenê.''
Şenî da zanayene ke tay dêrsimijî hemkarîya seydwanan kenê û vat: ''Tay hemkarî binê nameyê turîzmê seydwanîye de nê kerdişan meşrû kenê. Ma venga nê hemkaran danê ke wa cade nê kerdişan ra fek vera bidê.''