Dersîm de nobeta 'Ma Cuye Pawenê' ke semedê veradayîşê tepişteyanê nêweşan dest pêkerda dewam kena. Nobedarî vanê: Ma semedê tepişteyan merhamet ney edalet wazenê.
Komeleya Heqanê Merdiman (ÎHD) vizêr 30 bajaran de semedê tepişteyanê nêweşan Nobata 'Ma Cuye Pawenê' daye destpêkerdene. Nê bajaran ra yew zî Dêrsim bi.
Hemsereka ÎHDyî yê Dêrsimî Gonule Sonbahar bale ante rewşa tepişteyanê nêwaşan ser û şertanê zîndanan ser û vat: ''Ruh û bedenê tepişteyan binê tehlukeyî de yo. Bi caardişanê keyfîyan heqê esasî yê tepişteyan yenê bipaykerdene. Bitaybetî semedê tepişteyanê nêweşan tabloyê ke merdimî nîyê qewimîyenê. Ganî tepişteyê nêweşî cade bêrê veradayene. Ma semedê tepişteyan merhamet nê edalet wazenê.''
Wekîle HDP Alîcan Onluyî zî ard ziwan ke pêroyê welatî açarîyayo zîndan û vat: ''Nê welatî de her kes/e ameyo/a esîrgirewtene. Heqê tewr wîjdanî zî hetê îqtîdarî ra ameyî xespkerdene. Tirkîya zîndano akerde yo û şarê ke tede yê ameyî esîrgirewtene. Xora zextê tewr pîlî zî zîndanan de qewimîyenê. Faşîzm çiwext biwazo komelî esîr bîgiro tim verî zîndanan ra dest pêkeno.''
Ergîn Tekîn zî vat: ''Ma yew zîhnîyetî dir rî bi rî yê ke mîtîngan de mîjdanê viraştişê zîndananê neweyan dano. Îqtîdaro ke wazenê vengê muxalefetî bibirno zîndanan de zextan zafêr keno.''