Dêrsim de şayîyê Gaxanî dewam kenê. Qezaya Pilemurîye ya Dêrsimî de bi beşdarîya xeylêk hemwelatîyan Gaxan ame fîrazkerdene.

Şayîyê Gaxano ke hewteyê peyênî yê kanûne de û hewteyê verênî yê çeleyî de yeno fîrazkerdene, Dêrsim de dewam kenê.

Qezaya Pilemurîye ya Dêrsimî de  Metîn Kahraman, Haydar Çetînkaya, Cem Vazo, Ayten Yeşîltaş, Uzun Mehmet û Kamer Hoca zî tede komêka hunermendan şayîya Gaxanî serûber kerd. Hemwelatîyanê Pilemurîye dekewtişê qeza de kome pêşwazî kerde.

Hemwelatîyan hunermendan reyde aktîvîteyî kerdî, deyîrî vatî û şa bîyî.

Haydar Çetînkayayî derheqê Gaxanî de qisey kerd û vat: ''Gaxan de kulturê hetkarî û paştdayîşî vejîyeno vernî. Par ma pê pereyo ke arê dîya astengdarêkî/e rê bandê şîyayîşî girewt û wendekaran rê zî bursêko qij da. Seke zanîyeno pezkovîyî bawerîya ma de fîraz ê. Ma pê pereyê bînî zî vera seydwanîya pezkovîyan pankartî viraştî.''