Dêrsim de arêyo tarîxî yê awe ke 300 serrî yo kewt xizmet û tede xeleyo bêgubre tehnîyeno. Aşvan Fethî Asma derheqê babete de va: “Hedefê ma oyo ke ma tepîya agêrî tarîxê xo.”
Dewa Çemejûrî ya girêdayeyê qezaya Petagî ya Dêrsimî de arêyê awe yê 300 serrî hetê Mehmet Alî Yildizî ra ame tamîrkerdene û kewt faalîyet.
Yeno vatene ke Dêrsim de tena no arê heta roja ma ya ewro mendo. Nizdîyê 20 rojîyo ke arê kewto faalîyet û dest bi tehnayîşê xeleyî kerdo. Hedef oyo ke no arêyo tarîxî û xozayî bêro pawitene.
Fethî Asmayo (53) ke arê dano xebetnayeneîzeh kerd ke, arêyê înan 300 serrî yo û mîyanê demî de rijîyayo û hetê dewijê înan Mehmet Alî Yildizî ra newe ra ameyo tamîrkerdene. Asma da zanayene ke vengkerdişê dewan yê 1990î de arê ameyo qedexekerdene û serra 90î ra nata arê nêameyo xebetnayene.
Asma qiseykerdişê xo de winî va: “Senî ke kalikê ma yê verênan gubre nêxebetnayêne û xele tehnayêne, ma zî waşt ke wina bikerî. Hedefê ma oyo ke ma tepîya agêrê tarîxê xo ser. Hedefê ma yê bazirganî çin o. Hedefê ma oyo ke xeleyê bêgubre yê xozayî bêro tehnayene û bajar de bêro vilakerdene.”