Dêrsim de amadekarîya zimistanî dewam kena. Dewijî sewze û meyweyanê xo yê xozayîyan kenê wişk û wina xo seba zimistanî hadre kenê.
Dewa Koçpinarî ya qezaya Pêrtagî ya Dêrsimî de amadekarîya zimistanî dest pêkerde. Dewijî meywe û sebzeyanê xo yê xozayîyan kenê wişk û seba zimistanê danê wera.
Dewije Fergule Berk da zanayene ke ê nê karan pîlanê xo ra musayî û vat: ''Ma nê sebze û meyweyan nika wişk kenê, zimistanan wenê. Na qayde tamê înan zî hîna beno weş. Ma alinc û sayanê xo zî danê arê, kenê wişk û zimistanan pê xoşaf virazenê. Di tewir vamî estê; tal û şirîn. Vamî zaf bifayde yê, şîfa yê. Vamê talî nêweşîya şekerî rê şîfa yê. Ma vamanê şirînan zî sey çerez wenê.''