Xelata edebîyatî ya Hohenemsî ke nûştoxanê koçberan ê ke ziwanê maya înan Almankî nîyo la bi Almankî nûsenê rê yena dayîş, na rey dîya nûştoxa Kurde Karoş Taha.
Weşanxaneyê Hohenemsî yê Awusturya, serra 2009’î ra nata Xelata Edebîyatî ya Hohenemsî dano nûştoxê ke ziwanê maya înan Almankî nîyo labi Almankî nûsenê.
Tena Awusturya de ney Almanya û Swîsre ra zî nûştoxê ke bi Almankî nûsenê tewrê musabeqe benê. Seba girewtişê xelate 111 nûştoxanê koçberan muracat kerd. Jurîya xelate zî nûştoxa Kurde Karoş Taha layîqê xelate dîye.
Komîteya jurî va ke, Tahaya ke bajarê Zaxoyî yê Başûrê Kurdistanî ra ya, gama ke 9 serrî bîya bi keyeyê xo mecbûr menda koçê Almanya bikera. Seba qelema aye ya zafkulturî û zafziwanî înan a layîqê na xelate dîya.
Karoş Taha girewtişê xelate ra pey medyaya Awusturya rê qisey kerd û va, seba ke zereyê keyeyî de ziwan hem Kurdkî û hem zî Almankî yo berhemê mi rengên ê. Xeylê serran ra dima ma agêrayî Kurdistan. Maya mi nêzanêne bi kamcî ziwan mi dir qisey bikero. Seba ke ez bimûsa waştêne ke Almankî qisey bikero, seba ke ez Kurdkî xo vîrî ra nêkera mi zî waştêne ke Kurdkî qisey bikerî.”
Karoş Taha îzahe kerd ke hewnê aye zî hendî bi Almankî û Kurdkî yê û va, seba ke mi Xelata Hohenemsî girewt ez zaf kêfweş a.
Romanê “Beschreibung einer Krabbenwanderung“ (Qalkerdişê Rayraşîyayîşê Kerkencikêk) ya Karoş Taha serra 2018î de ame weşanayene. Romanê aye eyaletê NRW’yî yê Almanya de zî xelate girewtebî.