Merkezê Xeberan- Bi des hezaran cinîyî rayberîya Platformê Cinîyan ê Îstanbulî de çarçewa 25ê Teşrîne Peyene Roja Têkoşînê Vera Şîdetê Serê Cinîyan de Meydanê Tunelê Taksîmî de kom bîyî û ver bi kuçeyê Îstîklalî rayîrî ra şîyî.
Bi des hezaran cinîyî rayraşîyayîşî de sloganê ''Cinîyan mekişê, vernîya kiştişê cinîyan bigêrê'', ''Seba cayanê mendişî butçe, seba şerî ney'', ''Cinîyî pîya bihêz ê'', ''Camêrdî kişenê, dewlete pawena'' vatî. Cinîyan dima bi tirkî û kurdkî beyanatêk kerd. Beyanetê kurdkî hetê Şenaye Kumuz ra beyanatê tirkî zî hetê Îreme Gerkuş ra ameyî wanene.
Cinîyan çalakîye de pankart û dowîzî ser o nameyê cinîyanê ke ameyî kiştene nuştî. Cinîyan pare kerd ke her roje cinîyî yenê kiştene û ame vatene ke: "Cinîyî her roje wazenê camêrdan ra fek vera bidê û seba ke vanê ney yenê kiştene. Seba ke Peymana Îstanbulî û madeya 6284î nênê caardene cinîyî yenê kiştene."
Cinîyan beyanatan ra dima waşt ke rayraşîyayîşê xo dewam bikê la polîsan verê cinîyan girewt û destûr nêda ke cinîyî rayîrî ra şorê.
Dima ke cinîyan israr kerd polîsan bi fîşekanê gazî û guleyanê plastîkan mudaxeleyê cinîyan kerd.