Cenazeyê nivîskar û dîroknasê Kurd Prof. Dr. Kemal Mezher, ji Almanyayê bo Herêma Kurdistanê hat veguhestin û do bi şev gihîşt Balafirgeha Navdewletî ya Hewlêrê. Cenaze, ji aliyê Parêzgarê Hewlêrê Omêd Xoşnaw, Wezîrê Rewşenbîrî û Ciwanan Hemeyê Heme Seîd û hejmarek ji rayedar û malbata wî, hat pêşwazîkirin.
Biryar e, îro roja Çarşemê 24ê Adara 2021ê, bi amadebûna Serokê Herêma Kurdistanê Nêçîrvan Barzanî û hejmarek ji rayedarên payebilind ên Herêma Kurdistanê, di merasîmeke taybet û şayeste de pêşwaziya fermî li cenazeyê nivîskar û dîroknas Dr. Kemal Mezher bikin û pişt re ber bi bajarê Silêmaniyê, bo cihê dawî yê aramgeha wî ya li Girê Seywan bi rê bikin.
Prof. Dr. Kemal Mezher Ehmed, dîroknasê navdar ê Kurd, roja 16ê Adara 2021ê, li nexweşxaneyeke bajarê Bonnê yê Almanyayê koça dawî kiribû.
Prof. Dr. Kemal Mezher Ehmed, di sala 1937an li gundê Axceler a ser bi bajarê Kerkûkê ji dayik bûye û di sala 1955an de, qonaxa amadehiyê qedandiye. Sala 1959an li zankoya Bexdayê, lisansa dîrokê wergirtiye û di 1969an jî li Rûsyaya Sowyet, doktora dîrokê wergirtiye. Heta niha derbarê dîrokê û dîroka Kurdan de, bi dehan kitêb nivîsîne.