Cenazeyê Ayaz û Nûpelda Guloglû yê ke netîceyê teqayîşê wasitayêkê nizdê qereqolê eskerî yê qezaya Pulurî ya Dêrsimî de merdîbî, pîya ameyî wedartene.
Teqayîş roja Dişemeyî gomê Çakilçeşme yê pabesteyê dewa Bîlgeçî de virazîyabi.
Teqayîş de Ayaz Guloglû (8) û Nûpelda Guloglû (4) merdîbî.
Cenazeyê Guloglû yê waye û birayî, dimayê otopsîya Nêweşxaneyê Unîversîteya Firatî yê Xarpêtî, hetê keyeyî ra ameyî girewtene û bi kîtleyêka qerebalixî ameyî wedartene.
Parlamenterê HDP’yî yê Dêrsimî Alîcan Onlu, hemşaredarê Dêrsimî Fatîh Mehmet Maçoglû, Walîtîyê Dêrsimî Tûncay Sonel, temsîlkarê partî û sazîyanê cimatê sivîlî zî tede xeylî kesî tewrê merasîmî bîyî.
Pî Alî Ekber û maye Cebrîye Guloglû yê ke tewrê merasîmî bîyî bi zor serê lingan de vindertî. Dedê domanan Zeynel Guloglû va: “Ma vatêne qey mayîn a, la gama ke ma cenazeyî dîyî, ma dî ke teqayîşê madeyêkê cîyayî bi. Ma nêzanê madeyo ke teqayo çi yo û kamca ra ameyo. Her serre şinê ûca. Ûca cayêk bi ke çi merdim çi heywanî her çî şîyêne ûca. Problemêk seba şîyayîşê ûcayî çinbi. Naye ra ma nêzanê tirêm o madeyê teqayîşî senî ameyo ûca. Dozgerî derheqê cigêrayîşo ke kerdo de tu hayîdarî ma dir pare nêkerde. Dozgerî vat ke wa benda raporê otopsîye bê.”