Seyîdxan Kurij - Bremen Almanya
Feqîyê Teyran – Komela Nuṣtoxanê Kurd yê Almanya bi Komela Komkar yê Bremen rê pîya 11.10.2026`de Bremen de yew kombîyayiṣ organîze kerd.
No kombîyayiṣo ke moderatîya ey Mustafa Bîrden kerd de, nuṣtoxanê kurd Seyîdxan Kurij, Selîm Çurukkaya û Ahmet Akbaṣ beṣdar bîye. Tîya de verê Selîm Çurukkaya bi kirdkî cuwa pey Seyîdxan Kurij bi kurmancî derheqê „Feqîyê Teyran – Komela Nuṣtoxanê Kurd yê Almanya“ de malumat da hedreyan. Komela Feqîyê Teyran emser Almanya de amê ronayiṣ, her keso ke 1 kîtabê xo ameyo neṣir kerden û Almanya yan zî dewletanê dormarê Almanya de cuyena, eṣkeno bibo endamê na komel. Na komel sîvîl- demokratîk yew komel a, girêdayê yan zî nêzdîyê ço partî nê ya, yanî xoser a.
Dasinasnayenê komele dima nuṣtox Ahmet Akbaṣ kîtabe xo yo „Ezidîtî û Kurd“ da sinasnayen û kîtabê xo ra tayê qewlê ezîdîtîye wendî. Akbaṣ va, „ Ezîdîtîye, Kakaî (Yaresanî“ û Elewîtîye yew bîn ra zaf nêzdîye, hemeyan de zaf çî yê sey Ocax, Pîr uyb bîn seycîye yê. Dima Selîm Çurukkaya kîtabê xo „Kobanî Binnêkewt“ û „Fîlozê Pey Koyê Qafî de“ dayê sinasnayen. Selîm va mi kîtabê „Kobanî Binnêkewt“ Hewler de nuṣt. Mi tîya çend serekanê hêzanî Peṣmerge ke Kobanî xelesna, înan de qisey kerd û no kîtab nuṣt. Înan ra yewî pîrîkê ey bi bêmerg Mustafa Barzanî rê pîya ṣibi Yewtîya Sovyet, babîyê ey peṣmerge bi û eriṣkerdiṣê P.K.K yê 1995 Mazlum Abdî esîr girewibi, la verrada bi û o ṣîbi Kobanî ÎṢÎD ra xelesnabi“. Çurukkaya cuwa pey kîtabê xo yo „Fîlozê Pey Koyê Qafî de“ vervatê û yew qisim wend.
Cuwa pey cigêrayox / nustox Seyîdxan Kurij derheqê xebat û kîtabanê xo de agahî da. Seyîdxan Kurij kîtabê xo yê sanikan, fikrayan, deyîranê Çewlîg, hîkayeyan, roportajan û yê derheqê Hereketa Ṣêx Seîd û xebatê Peter Lerch ya kurdolojî dayê sinasnayen. Seyîdxan xebata „Gruba Xebatê ya Vateyî“ û kovara „Vate“ sero zî malumat da û sey tîyatro sanika „Pîr Luye“ va. 2 kîtabe Seyîdxan Kurij yew yê sanikan û yew yê hîkayeyan bi nameyê „Märchen aus Kurdîstan“ û Geheime Schmerzen“ bi almankî ameyê neṣir kerden.
Wendiṣê nuṣtoxan ra pey goṣdaran pers perskerdî û nuṣtoxan cewabê înan da. Sey heme kombîyayiṣanê kurdan zafê qisekerdoxan vînaye xo zî ardê ziwan.