Merkezê Xeberan - Vizêr şan dest nîyabi wekilîyê Hemsereka KCDyî û wekîla HDPyî ya Colemêrgî Leyle Guven, Wekîlê HDPyî yê Amedî Musa Farisogullari û Wekîlê CHPyî yê Îstanbulî Enîs Berberoglu ser. Wekîlanê HDPyî seba ke nê qerarî protesto bikerê Meclîsê Grûba HDPyî de beyantêk day.
Serewekîlanê Grûba HDPyî zî tede wekîlan beyanatî ra dima Kizilayî ra ver bi Parka Guvenî dest pê rayraşîyayîş kerd.
Polîsan Parka Guvenî de bendî nayî ro û bi bahaneya ''Destûrê walîtîye çin o'' wekîlê HDPyî asteng kerdî. Polîsan dima hêrişê wekîlan kerd, çaketê Wekîlê Adana Ridvan Turanî û verçimikê Wekîl Kemal Bulbulî şiknay.
Wekîlanê HDPyî nêzdîyê Parka Guvenî de Bulvarê Ataturkî de beyanatêk da.
Serekwekîlê Grûba HDPyî Saruhan Oluçî vat: ''Ewro nê hêrişî zî mojna ke darbe esta. Îqtîdar vera huqûq, adelet, sîyaset darbe keno. Îqtîdarî wekîlîya raqîbanê xo batal kerde. Pê hukmkerdişî vera raqîbanê xo têkoşîn keno. No îqtîdar keno ke estbîyayîşê îqtîdarê xo bido dewamkerdene, sewbîna yew armancê ci çin o. No îqtîdar îqtîdarê şerî yo.