RÛPELA NÛ
Beledîyeya Çewlîgî ke destê hukmatê AKP de ya afîşanê xo de ca nêdana ziwanê şarî û bi tirkîyêka xirabe huyayîşê şarî ana.
Beledîyeya Çewlîgî semedo ke wa şar tedbîranê vera virusê Korona bigîro afîşî aliqnayî. Pankartan de bi tirkî şarî ra ame waştiş ke wa bê maske nêvejyê teber û tedbîran bigîrê.
Afîşî sey her wextî tirkî ameyî hadrekerdiş la na hewe tirkîya ke Çewlîg de yena xebitnayîş afîşan ser o amey nuştiş. Afîşan ser o “Hele 1.5 metre uzağ dur ele konuşağ, sen odur nereye gidersin ele maskesiz, Allah vere sen herkesi hasta edesin, insan bilmer insanın önünde ne var” ifadelerine yer verildi” nusîya.
Zanîyeno ke hetê dewleta Tirkîya ra ziwanê ma ser o polîtîkayê asîmîlasyonî dewam kenê û her dezge û mektebanê Tirkîya de ziwanê tirkî ferz o û ziwanê ma qedexe yo.
Tirkîya de Bakûrê Kurdistanî de yena qisêkerdiş zî bi mantixê kurdkî ya û tirkîyêka ecêb a. Tirkîya ke bi destê dewlete û bizorî ameya ferzkerdiş zî nika sey yewbînan dir yarîkerdiş yena xebitnayîş.
Beledîyeya Çewlîgî hem xebatanê xo de ca nêzana kirdkî hem zî pê tirkîya yarîkerdişî afîşan aliqnena û hem xo dir hem zî ziwanê şarê xo dir yarî kena.
Na kerdene Beledîye medyaya sosyale ser o raştê hêrsê Çewlîgijanê welatperweran amey.