Beledîyeya qezaya Dîyarbekirî Baglarî a ke hetê YSK ra destê HDP ra ameya girewtiş û dîyaya AKP 180 heb karekeranê neweyan gêna.
Goro ke vajîya, Serekê Beledîyeya Baglarî Huseyîn Beyogluyo ke namzetê AKP bi û se ra 20 ray girewtbi, perosonelanê neweyan gêno.Kesê ke Beledîyeya Baglarî rê bêrê girewtiş do daîmî bê.
La îdîa beno ke kesê ke bêrê girewtiş do nêkewê mulaqat, pêro verî ra amê tespîtkerdiş, zafê xo endamê AKP yê û mîyanê înan de kesê ke verê cû beledîye ra ameybî eştiş çin ê.
Endama Meclîsa Beledîyeya Baglarî Zubeyde Zumrute derheqê girewtişê personelan de qisey kerd û va “Eke lazimtî esta wa personelê newî bêrê girewtene. Ma çîyêk nêvanê. La ma zanê ke qeyûmî senî personel gênê beledîye. Gere mîyanê personelan de cîyayî nêra kerdene. A bîne zî kesê ke yenê girewtene gere nufusê înan Baglar de bo. Eke torpîl yan zî merdimanê xo bigêrê kar ma do qebûl nêke.
Seke yeno zazanayîş Serekê Beledîyeya Bagllarî Huseyîn Beyoglu wexto ke hetê YSK ra sey qeyûm tayînê Beledîyeya Baglarî bi, ewilî birayê xo Haşîm Mertoglu ard beledîye û kerd hetkarê xo.Huseyîn Beyogluyî dima ra bi 5 mîlyon lîre xo rê wesayîtêko zirxî girewt.
Heto bîn ra HDP zî vana ke, kesê ke demê tayînkerdişê qeyûman de beledîye ra, kar ra ameybî eştiş ma do înan peyser bigîre beledîye. Endamê Meclîsa Beledîyeya Dîyarbekirî Mehmet Akdogan vano: Kesê ke nanê înan destê înan ra ameyo girewtiş ma do wayîrê înan bivejîyê. Ma komîsyona huquqî naya ro. Ma do kesê ke bîyê mexdur înan pêrune bigîre kar.
Akdoganî îzah kerd ke heme mal û milkê Beledîyeya Dîyarbekirî amo talankerdiş û va: Perê şarî amo xerckerdiş. Kesê kes sey qeyum fikrîyenê do beledîye ra bêrê vetiş. Ma do hevalanê xo peyser bigîre.