Balyozê Brîtanya yê Iraqê Stephen Hickey, li ser êrîşa terorîstên DAIŞê bi ser hêzên Pêşmerge de daxuyanî da û piştgiriya welatê xwe bo Herêma Kurdistanê ragihand.
Hckey li ser medya civakî twîta Serokwezîrê Herêma Kurdistanê Mesrûr Barzanî ya derbarê avakirina bilez a hêzên hevbeş bo têkoşîna dijî DAIŞê jê girt û got, “Qralîyeta Yekgirtî di têkoşîna dijî DAIŞê de piştevanê Herêma Kurdistanê, Pêşmerge û hemû iraqiyan e.”
Balyozê Brîtanyayê herwiha got, “Ji bo têkbirina DAIŞê ew dê alîkariya leşkerî û avadankirinê berdewam bikin. Emê piştevaniya xwe ya bo bidawîanîna valahiya ewlehiyê li navçeyên nakok ên Hewlêr û Bexdayê berdewam bikin.”
Hêjayî gotinê ye, DAIŞê doh jî li Pirdê êrîşî xalên hêzên Pêşmerge kiribû û di encama wê êrîşa ji aliyê Pêşmerge ve hatibû şikandin de, 3 Pêşmergeyên Kurdistanê şehîd bûbûn û 2 jî birîndar bûbûn.