Ayfer Duzdaşe ekserî muzîk û kulturê Elewîyan ser o kede dana û heta ewro xeylê karê serkewteyî kerdê.
Muzîsyene Ayfer Duzdaşe Sêwasij a. Bi serran ra nat mîyanê xebatanê muzîkî de ya. Xebatkaranê Merkezê Kulturî yê Mezopotamyayî ra ya. Ayfer Duzdaş mîyanê Koma Vengê Sodirî de kewte mîyanê deryayê deyîranê Kirmanckî. Xora Ayfer bi xo zî Kirmanc a. Ayfer mîyanê Serran de xebatê xo aver berdê û mîyanê xeylê projeyan de ca girewt. ‘Leylan’ albumê ci yo solo yo verên o. Ayfer Duzdaş 2019î de albumêko xeyle serkewte vet. Nê albumê xo de Ayfer Duzdaşe kewte kilamanê Elewîyan dima. Nameyê nê albumî ‘Ji Xoresanê Heta Çorimê Newayên Kurdên Elewî’ yo. no albumê arêdayîşî yo. Ayfer Xoresan ra bigere heta Çorim kewta kilamanê Elewîyan dima û xebatêka serkewtî veta Meydan.
Ayfer Duzdaşe do bi taybetî bi deyîranê albumê deyîranê Elewîyan Dîyarbekirî de konserêk bida. Konser do 24ê Temûze de sehneyê serakerdeyî yê ZAROK Mayî de bêro viraştene. Sehneyê serakerdeyî yê ZAROK Mayî wextanê peyênan de xeylê muzîsyenê başî kerdê mêman.