Merkezê Xeberean - Şanê pancşemeyî Syriza zî tede bi vengdayîşê partîyanê çepgîran û komanê anarşîstan bi hezaran kesî meydanê Akademia de kom bîyî û seba koçber û multecîyan rayşîyayîş kerd.
Qefleyê şarî waşt ke ver bi Parlamentoya Yunanî û Temsîlkarîya Yewîya Ewropa ya Atina şoro labelê verê Parlamento de qefle rastê astengîya polîsan ame.
Polîsan destûr nêda ke çalakîkerî ver bi herêma ke eşkera kerde şêrê. Qefleyê şarî dima ke wextêk verê parlamentoye de sloganî vatî agêra meydanê Akademia.
Partîyanê çepgîran û komanê anarşîstan ê Yunanîstanî bi vilawekan û qiseykerdişan nêzdîbîyayîşê Hukmatê Tirkî û Yunanî yê vera koçberan bi vatişê ''faşîzmî'' pênase kerd. Kurdî zî tewrê çalakîye bîyî.