Dewleta tirke hêrişanê îşxalî yê vera Başûrê Kurdîstanî rê dewam kena. Dewêka Kanî Masî de hêrişê obusî de dewijêk birîndar bi.
Dewleta tirke 23ê nîsane ra nata hêrişê herêmanê Zap, Metîna û Avaşînî yê Başûrê Kurdîstanî kena.
Vizêr nêmeroje de dewa Hirorê ya Kanî Masî bîy hedefa obusanê dewleta tirke. Dewijê bi nameyê Remezan Alî hêrişê obusan de birîndar bi û hetê dewijan ra wedarîya nêwşexaneyêkê Zaxoyî.
Dîya zanayene ke dewijî ra gonî şîya la rewşa ey a weşîye giran nîya. Dewa Hirorê 38 rojîyo ke binê bombardumanê dewleta tirke de ya. Hêrişan de zerar reseno hêga, erazî, ban û canê şarî.