Qezaya Elmadagî ya Anqara de keyeyêkê kurdî rê hêrişo nîjadperest ame kerdene. Cinîya bi nameyê Z.D. û 5 tutê aye mehla ra amey veteiş.
Kuçeyê Derya yê taxa Îsmetpaşayî yê qezaya Elmadagî yê Anqara de vera keyeyêkê kurdî hêrişêko nîjadperest ame kerdene. Perey şewe saete 10.30 de cîrananê Z.D. (38) a ke geverij a, ci rê vat 'kurdê pîsî', 'terorîstî' û kerd ke hêrişê înan bikerê. Z.D. va: ''Ez û 5 tutê mi 2 serrîyo ke ma tîya de xebitîyenê. Çend hewteyo ke ma rê heqaretan kenê. Semedo ke ez apartmanî ra şêra înan îmzayî arê dayî.''
Z.D.ya ke mêrdeyê xo ra cîya bîya û 5 tutanê xo reyde manena,va ke lajê aye keyeyan de pakîye keno û 15 rojîyo ke gêrenê keyeyêk. Z.D. va: ''Vizêr înan tutanê mi het de vat 'Ma kurdan nêwazenê.' û xîret kerd ke hêrişê ma bikerê. Heqaretan ra dima ma gerreyê polîsan kerd. Înan verê polîsan de zî xîret kerd ke hêrişê ma bikerê. Wexto ke polîsan ê tepiştêne înan ra yew hêrişê ma kerd. Lajê mi tersî ra kardî girewt xo dest. Dima polîsan lajê mi tehdît kerd û vat 'Ma tîya de yê la to kardî girewta xo dest. Ma eşkayêne to bikişê.' ''
Keyeyî hêrişî ra dima keyeyê xo hewilna Hasanoglanî.
20ê temmuze de zî qezaya Altindagî ya Anqara de vera keyeyêkê kurdî hêrişo nîjadperest ame kerdene û hêriş de 4 kesî birîndar bîyî. 21ê temmuze de Konya de zî Hakîm Dal amebi kiştene.