Supaya Pasdaran a Îranê ragihand ku wan wekî bersiva êrişa li ser Bender Ebasê, baregeheke asmanî ya Amerîkayê ya li herêmê kiriye hedef.
Di heman demê de Kuweytê eşkere kir ku bi mûşek û dronan êrişî welatê wan hatiye kirin.
Supaya Pasdaran a Îranê bi daxuyaniyeke nivîskî ragihand ku Amerîkayê îro berê sibehê li derdora Balafirgeha Bender Ebasê xalek bombebaran kiriye.
Supaya Pasdaran destnîşan kir ku wan jî wekî bersiv êrişî wê baregeha asmanî ya Amerîkayê kiriye ku êriş jê hatibû kirin.
"Hişyariyeke cidî ye"
Di daxuyaniyê de hat gotin, "Ev bersiv hişyariyeke cidî ye da ku dijmin zanibe êrişkariya wî bêbersiv namîne.
Heke ducare bibe, bersiva me dê tundtir be. Berpirsyariya encamên êrişê li ser milê êrişkar e."
Her çi qasî nehatibe diyarkirin ku baregeha Amerîkayê li kîjan welatî ye jî Kuweyta ku mazûvaniya baregehên Amerîkayê dike ragihand ku rastî êrişeke bi mûşek û dronan hatiye.
Li Kuweytê teqîn
Artêşa Kuweytê li ser cihê ku hatiye hedefgirtin ti agahî nedan.
Televîzyona dewletê ya Îranê jî ragihandibû ku berê sibehê li rojhilatê Bender Ebasê yê li başûrê welêt dengê sê teqînan hatiye bihîstin.
Artêşa Amerîkayê berê ragihandibû ku wan ji ber ku ji bo hêzên Amerîkayê û trafîka deryayî ya bazirganî metirsî ye, êrişî herêmeke leşkerî ya li başûrê Îranê kiriye.