Merkezê Xeberan- Wexto ke 3ê çeleyî de fermandarê Îranî Qasim Silêmanî hetê Amerîka ra ame kiştiş û Îran zî 8ê çeleyî de seba cewabdayîşî fuzeyî eştî 2 baregehê Amerîka yê Iraqî, Amerîka ra beyanatêk seba kêmkerdişê alozî amey.
Vajîya ke DYA Konseya Asayîşî ya Neteweyanê Yewbîyayî rê mektubêk erşawita. Mektub bi îmzaya Temsîlkara Daîmî ya DYA ya Neteweyanê Yewbîyayî Kellye Craft ame erşawitiş û kiştişê Silêmanîyî sey ''pawitişê meşrûyî'' nişan dîya. Mektub de ame îfadekerdene ke seba ke Îran reyde haştîye û asayîşê mîyannetweyî zafêr nêkewê rewşêka bitehlûke yan zî alozîya Îranî pîlêr nêba DYA amade ya ke bê şert Îran reyde pêvînayîş bika.