Merkezê Xeberan- Amedspor tim rastê tedayan yeno. 4 serrî yo ke seba Amedsporî ''qedexeyê terefgîran'' esto. Sîyasetmedarî Amedspor sey hedef mojnenê, mufetîşî timî tehqîqatê malîyî danê destpekerdene û qeyûmî zî hetkarîya ekonomîkî ya seba Amedsporî qedînenê. Amedspor seba ke krîzê ekonomîkî ra bixelîso gêreno çareserîyan û xebetanê xo dewam keno.
Serekê Amedsporî Metîn Kilavuzî îzeh kerd ke, meseleyê fînansalî verê taximî de astengîyê pîlî ê.
Kilavuzî da zanayene ke Amedspor mîyanê şer û mercanê zoran de têkoşînê xo dewam keno û va, eke şar hetkarîya Amedsporî bikero tay meseleyî do safî bibê. Kilavuzî venga heskerdoxanê Amedsporî da ke paştî bidê Amedsporî.
Kilavuzî vat: ''Yeno waştiş ke Amedspor bêro çinkerdene. Wazenê ke bi hawayêko madî ma terbîye bikê. Dormeleyê ma amo girewtiş. Ma venga pêro kesan û heskerdoxanê Amedsporî danê ke wa nê prosesî de paştî bidê ma, wayîrê Amedsporî bivejîyê. Çunke sewbîna yew Amedspor çin o. Eke meseleyê ma yê ekonomîkî çareser bibê ma do zaf bibê rehet û ser bikewê."