Platformê Paştdayîş û Pawitişê Bajarî yê Dîyarbekîrî wayîrê Amedsporî vejîya ke Bursa de raştê hêrişê nîjadperestî amebi û veng da ke wa her kes vera nîjadperestîye vejîyo.
Platformê Paştîdayîş û Pawitişê Bajarî yê Dîyarbekîrî ke semedê erdlerzî ame ronayene û tede 80î ra zafêr rêxistinê komelê sîvîlî ca genê, semedê paştdayîşê Amedsporî ke vizêr Bursa de raştê hêrişê nîjadperestî yê organîzkerdeyî ame, Tesîsanê Şehmuz Ozerî de eşkerayîye daye.
Serekê Heyetê Îstîşareyî yê Amedsporî Burç Baysalî vist vîrî ke sere de Amedspor heme taximê Kurdîstanî tim raştê tazahuratanê nîjadperestan yenê û vat: "Vizêr sembolê nîjadperestî ameyî şuxulnayene ke pê nînan wazenê serranê 90yan bîyarê şarî vîr. Peyê nê de têna paştgêrê Bursasporî çîn ê. Amedsporo ke semedê bingeyê haştîye zaf muhîm o, pê paştîdayîşê rêxistinanê komelê sîvîlî payra yo.
Serekê Baroyê Amedî Nahît Erenî bi nameyê rêxistinanê komelê sîvîlî qisey kerd. Erenî vat: "Hela ke Amedspor resa Bursa hêrişan dest pêkerd û statt de wextê kaykerdişî de zêdîya. Nê sembolê ke vîrê komelê kurdan de bi heme tarîtîya xo ca genê, musabaqaya futbulî de yenê mojnayene. Pê nê mesaj yeno dayene û yeno waştene ke wa atmosferê tersî bêro afirnayene. Xora seba ke serranê 90yan de sûcê ke vera kurdan bîyî, nêameyî cezakerdene, ewro tayî xo nêyî ra weye kenê."
Gerek Federasyonê Futbolî yê Tirkîya cade wezîfeyê xo bîyaro ca û cezaya dîsîplînî bido. Gerek Bursaspor sey binkewteyî bêro hesibanyene. Wa Walîyê Bajarî û Mudirê Polîsan ê Bajarî cade derheqê berpirsîyaran de cigêrayîş bidê destpêkerdene û hêrişkaran karî ra bîfinê dûrî. Sere de bajarê ma heskerdoxê Amedsporî wa 24 saete logoyê ci bikerê profîlê xo û hewteyêk flamayanê ci wesayît, keye û cayanê karê xo de bidaliqnê. Ma pêro pîya vera nîjadperestîye bivejîyê."