Amed de çarçewa seferberîya aşîya Korona de qerar dîya ke bêmaske ameyîşê veyveyan ame qedexekerdiş.
Serekê Odaya Sanayî û Bazirganîye ya Amedî (DTSO) Mehmet Kayayî û Merdimanê Karî yê Sektorê Veyveyî kombîyayîşêk kerd. Kombîyayîş de semedo ke vernîya waqayanê janê Korona bêro girewtene tay qerarî ameyî girewtene.
Qerarê ke ameyê girer wina yê:
-Pêro personelê salonanê veyveyî do aşî bibê.
-Bêmaske çew do nêeşko tewrê veyveyanê salonan bibê û temamîya veyveyî de şuxilnayîşê maske do mejbûrî bibo.
-Dawetîyeyan de mejbûrîya maske do bêra eşkerakerdene.
-Salonan de personelêk/e derheqê tedbîranê vera janî de tim hîşyarîyan bikero/a.
-Salonan de semedê caardişê tedbîranê mesafe, maske û pakîye anonsî do bêrê kerdene.
-Kilê meymananê veyveyî do bêro peymitene.
-Seba teşwîqkerdişê aşî hunermendê herêmî yê Amedî deyîrêke vajê û vîdeo bigêrê.