Şaredarîya Bajarê Girdî ya Amedî, seba 21ê Sibate Roja Ziwanê Dayîke ya Cîhanî, Merkezê Kultur û Kongreyê yê Amedî de pêşwazîyêk viraşt. Pêşwazî de, tewrê Hemsereka Şaredarîya Bajarê Girdî Serra Bucak, hemserekê şaredarîyanê qezayan, Sereka Dayîreya Kultur û Karanê Komelkî Zeynep Yaş, rêvebirê Partîya Welatparêzanê Kurdistanî (PWK), nuştox û hunermendê ke warê Kurdkî de xebatan kenê û şarî beşdar bî.
Hemsereka Şaredarîye Bucak verê bi meymanê ke beşdarê çalakîye bîyî reyde sohbet kerde û dima ser çalakîyanê 21ê Sibate û muhîmîya ziwanê dayîke qisey kerde. Bucakî sipasîya xo Serekatîya Dayîreya Kultur û Karanê Komelkî û Yewîneya Ziwanî rê kerde û va: "Yew programo zaf weş û têr û tije amade kerdo. Ez sipasîya xo înan, endamê meclîsî û şaredarîyanê qezayanê merkezî rê kena."
Qiseykerdişê Bucak ra dima, ziwanzanê namedar Mehmet Malmîsanijî qisey kerd. Malmîsanijî sipasîya xo pêroyê kesanê ke çalakî de emeg dayo ra kerde û va: "Seba Zazakî cayêko hîrayer lazim o. Ganî xebatê ser Zazakî hîna zêde bêrê destekkerdiş."
Dima, çarçewaya 21ê Sibate Roja Ziwanê Dayîke ya Cîhanî de "Şewa Kirmanckî (Zazakî)" ame viraştene.
Şewe de ke bî cayê çalakîyanê kulturî, şîîrî, deyîrî û mesajê ser ziwanê dayîke vecîyayî ver.
Şewe de Celo Boluz, Derya Cengiz, Eylul Nazlier, Xoser Rayirwan, Wusar, Bedriye Topaç, Omer Barasi, Îdrîs Yazar û Mem Keleş Çîçek bi şîîr û deyîranê xo yê kirmanckî, şewêka vîrî beşdaran rê pêşkêş kerdî.
Rûpela Nû / Amed