Merkezê Xeberan - Destpêkerdişê vilabîyayîşê vîrusê Korona ra nata dezge û wezaretê dewlete bîlançoya şaristanan pare nêkerdêne. Amed de tay rêxistinê weşîye pare kerdêne ke 19 kesî vîrusî ra merdê. Platformê Weşîye yê Amedî zî da zanayene ke şaristan de 200 kesî pê vîrusî kewtî û 300 nêweşê şikdarî estê.
Gorê beyanatê Mudirîya Weşîye ya Amedî Amed de heta nika hezar û 145 testî ameyî kerdene. 616 kesan muracatê nêweşxaneyan kerd. 213 nêweşî nêweşxaneyan de yenê weşkerdene. Bi temamî 213 kesî pê vîrusî kewtî. 8 kesî zî vîrusê Korona ra merdî. 89 kesî nêweşîye ra xelisyayê.
Goreyê beyanatî 5 qezayan ra teber 12 qezayanê Amedî de vîrusê Korona ame tesbîtkerdene. Baglar de ke tede nêweşîye tewr zaf tesbît bî, 48 nêweşî estê. Farqîn de 30 kesî, Yenîşehîr de 28 kesî, Bismil de 15 kesî, Sûr de 14 kesî, Erxenî de 6 kesî, Çinar de 3 kesî, Licê de 3 kesî, Qulp de 2 kesî, Pîran, Hani, Hezro de zî kesêk/e bi temamî 213 kesî pê vîrusî kewtî.
Çêrmûge, Şankûş, Gêl, Karaz û Kayapinar de vîrus hema nêame tesbîtkerdene.