Merkezê Xeberan - Amed de prosese normalbîyayîşî ra dima, tedbîrê vera virusê Korona hetê hukmatî ra amê siskerdiş û bi no qayde vîrûsê korona zede bi.
Xeylê xebatkarê weşîye zî demo peyên de bi virusê Korona kewtê û bine rîskî de yê. Amed de siskerdişê tedbîran ra dima hûmara xebatkaranê weşîye ke bi virusê Korona kewtê zede bîy. Gorê Sendîkaya Kedkaranê Xizmetê Weşîye û Komelî (SES) a Şubeyê Amedî hûmara xebatkaranê weşîye êyê ke bi korona kewtê 100 ra vejyaya 150 kes.
Hemsereka Şaxa SES'î ya Amedî Yildiz Ok vana ke, Amed de nê rojan de virusê Korona xeylî zede bîyo, nika Amed de hîrê nêweşxaneyê pandemî pirr bîyê û heta nika 150 xebatkarê weşîye bi korona kewtê.
Hemsereka SESî ya Şubeyê Amedî Yildiz Ok Orak derheqê rewşa xebatkaran de qisê kerd û da zanayîş ke, zêdebîyayîşê hûmara xebatkaranê weşîye ê ke bi korona kewtê rîyê siskerdişê tedbîran ra yo û seba ekonomi no qerar ameyo dayîş.
Orak vana ke: Rewşa xebatkaranê weşîye weş nîya Hukmatî sozê ke mîyanê nê 3 aşman de dabî nêardî ca. Her roj hûmara xebatkaranê weşîyê ê ke bi korona kewenê zede bena. Qismêk xebatkarî zî mirenê. Herinda çepikan gere hukmat semede xebatkaranê weşîye gaman bierzo. Nika Amed de hîrê nêweşxaneyê pandemî pirr bîyê."
ÇIME/MA