Her roj hejmara kuştiyên çeteyên Sûrî yên di şerê Nagorno – Qarabaxê de, zêdetir dibin. Li Azerbeycanê hejmara kuştiyan gihîşt 217 kesan. 9 termên kuştiyên çeteyên Sûrî ji şerê çeperên Nagorno – Qarabaxê de, gihîştin Efrîna Rojavayê Kurdistanê.
Li gor zanyariyên ji Afrinpostê, 9 termên kuştiyên çeteyên Sûrî ji şerê çeperên Nagorno – Qarabaxê gihîştin Efrînê.
Herwiha zanyarî diyar dikin, 4 çekdarên kuştî ji milîsên “El-Emşat” in, yek ji wan bi navê “Ebû Yezen” e, û ew li gundê Kaxirê yê Mabetayê hatin veşartin. Ji wan 9 kuştiyan, 3 ji milîsên “Sultan Mûrad” in û li goristana taxa Zîdiyê li naverasta Efrînê hatin veşartin. Herwiha 2 kuştiyên din jî, ji koma Oso ya milîsên “Cebha El-Şamiyê” ne, yek ji wan “Ebû Mihemed El-Biyanûnî” ye û li goristana “Kersane” li başûrê bajarê Efrînê bi 1 KM hatin veşartin.