34ê rêxistinê ekolojî yê ke Îstanbulî ameyî Dêrsim vat texrîbatê ekolojîkî polîtîk o. Dêrsimijan zî vanê, bi serran o dewe, daristan û merdimê înan yenê vêşnayene.
34ê rêxistinê ekolojî seba ke bale binace şewatê daristanî ser, Îstanbulî ra ameyî Dêrsim. Temsîlkarê partîyanê sîyasîyan û rêxistinanê komelê sîvîlî Meydanê Seyîd Rizayî de heyetî reyde ameyî têhet.
Bi nameyê rêxistinanê ekolojîstan Temsîlkarê Têgêrayîşê Ekolojî yê Mezopotamya Vahap Işikliyî qisey kerd. Işikliyî bale ante talanê xoza ser û vat: ''Tirkîya de daristanê benê qûrbanê rantî. Dêrsimî ra heta Cûdîyî, Çewlîgî şewatî dewam kenê. Nê şewatî rîyê operasyonan ra vejîyenê û eynî sebeban ra destûr nêdîyeno ke şar şewatî hewna bikero.''
Serekê Komeleya Dormeyî yê Munzurî Ali Yildizî ard ziwan şewatê daristanan sûc o vat: ''Çi heyf ke bi serran o Dêrsim de dewî, daristanî, merdimê ma yenê vêşnayene. No sûcê merdimîye yo, sûcê xoza yo.''
Badê qiseykerdişan ekolojîstê ke Îstanbulî ra ameyî bi deyîrêke bale ante serê texrîbatê xoza.