Duh li navçeya Bodrum a bajarê Mûgla ya Tirkiyê belemeke koçberan li Derya Egeqê noq bû. Di belemê de 21 koçber hebûn û ji wan 3 jin xeniqîn, 18 kes jî hatine rizgarkirin.
Berpirsê Federasyona Penaberên Iraqê li Stenbolê Kurde Yeşar ragihand, ku piraniya wan koçberan xelkê Başûrê Kurdistanê bûne û hersê jinên ku xeniqîne jî xelkê Silêmaniyê bûne.
Kurde Yeşar got: “Navê kesên xeniqîne Arezû Tariq, Hewraz Tariq in ku ev herdu xwîşkên hev in, ji navçeya Derbendîxanê ne û herwiha jina din jî xelkê Silêmaniyê ye.”
Yeşar da xuyakirin, ku kesên hatine rizgarkirin niha ji aliyê hêzên ewlekariya Tirkiyê ve hatine binçavkirin û got: “Termê wê jina ji Silêmaniyê hê jî nehatiye dîtin. Ew ên Derbendîxanê jî 5 xwîşk û 2 zarok bûne û xwestine bi rêya qaçax herin Ewropayê.
Bi gotina Berpirsê Federasyona Penaberên Iraqê li Stenbolê ji ber vê bûyerê 6 qaçaxçî ji aliyê hêzên ewlekariya Tirkiyê ve hatine girtin.
Herwiha Kurde Yeşar ji bo peydakirina termê jina wendayî daxwaza alîkariyê kir û got: “Konsulxaneya Iraqê li Stenbolê bi ti awayî bersiva daxwazên me nedane û alîkariya me nake.”