Merkezê Xeberan- Wezaretê Zereyî Yê Tirkîya bi beyanatêk aşkera kerd ke, şaredarîyanê bajarê Colemêrgî, qezaya Geverî û qezaya Mêrdînî Nisêbîn rê qeyûmî amê tayînkerdiş.
Her di hemserekê Şaredarîya Nisêbînî, Semîre Nêrgiz û Ferhad Kut û endamê Meclîsa şaredarî Mehmet Emîn Alkan vizîr ameybî tepiştiş û erzîyabî hepisxaneyan.
Ewro bi qerarê Waliyê Mêrdînî, Qaymeqamê Nisêbînî Mehmet Balikçilar sey qeyûm tayînê Şaredariya Nisêbînî bi.
Heto bîn ra Qaymeqamê Geverî Osman Dugramacî zî sey qeyûmê şaredarîya Geverî herinda Remziye Yaşar de ame tayînkerdiş.
Hemserekê Şaredariya Geverî Remziye Yaşar û Îrfan Sarî, bi îdîaya entamtîya rêxistina PKK amê tepiştiş û erzîyê hepisxane.
Heto bîn ra mehkema Hemserekê Şaredarîya Colemêrgî Cîhan Karaman zî bi îdîaya endamtîya rêxistine ra tewqîf kerd. Herinda Cîhan Karamanî de, Waliyê Colemêrgî Îdrîs Akbiyik sey qeyûm ame tayînkerdiş.