Merkezê Xeberan - Parlementerîya parlementera HDPyî Leyla Guven û ya Musa Farisogullari û wekîlê CHPyî Enîs Berberogluyî seba ke derheqê înan de cezaya qetî esta amey wardayene.
Heyetê Pêroyî yê Meclîse de seba ke derheqê wekîla Hemsereka Kongreya Komela Demokratîke (KCD) û wekîla Partîya Demokratîke ya Şaran (HDP) ya Colemêrgî Leyla Guven, û wekîlê HDPyî yê Amedî Musa Farisogullariyî û wekîlê CHPyî Enîs Berberogluyî de qerarê cezaya qetî esto wekîlîya înan amey wardayene.
Wekîlanê HDP û CHPyî no qerar sey derbe name kerd û meslîse de pê pirodayîşê masayan protesto kerd.
Serekwekîla Koma HDPyî Merale Daniş Beştaş no sey dewamê derbeya 4ê teşrîna peyêne hesibna û va, eleqeya îqtîdarî bi parlamento û îradeyê şarî nêmenda.
Guvena ke banê KCDyî yê Amedî de wardayîşê wekîlîya xo eşnawit vera nê qerarî nîşanê serkewtişî da û vat Xoverdayîş cuwiyayîş o.
Wekîlê ke wekîlîya înan ameye wardayene nameyê înan lîsteya meclîse ra ame wedaritene û lîsteya 'wekîlîya înan qedîya' amey aliqnayene.