12 baroyê herême ke mîyan de Baroya Dîyarbekirî zî ca gêna, beyanatêko hempar day û operasyono leşkeri o ke Tirkîya teberê sînorê xo de daya dest pêkerdiş şermezar kerd. Baroyî vanê, “Ganî ma her rewşe de aşitîye biwaze”.
Baroyê Dîyarbekirî, Êlîh, Çewlîg, Dêrsim, Agirî, Colemêrg, Mêrdîn, Mûş, Sêrt, Riha, Şirnex û Wanî derheqê operasyonê Tirkîya o ke teberê sînorê xo de daya dest pêkerdiş de beyanat day. Beyanat da dîya zanayîş ke, operasyon de xeylê kesî dinayaya xo bedilnayê û wîna ame vatene “Cayê ke hewa ra ci rê operasyon virazîyayo, Surîye de serra 2011 ra tepîya cayê ke DAIŞî ra ameyê pakkerdiş ê, cayê ke tede probleme asayîşî çin o û cayê ke tede Kurdî cuyenê yê.”
Beyanatê baroyan de wîna ame vatiş: “Tirkîya hewl zana ke bi pêrodayîş û şîdet meseleyî nênê çareserkerdiş. Ma ê baroyê ke cêr de îmzaya înan esta, vera şerî vejîyenê, aştîye wazenê. Ma zanê ke nê operasyonî zirar danê aşitîya mabênê şaran. Nê çîyê ke yenê kerdiş benê sebebê problemanê neweyan. Ma hukmatî ra wazenê wa herinda operasyonanê leşkerî, meseleyê ke estê, bi rayîrê aşitîye û sîyasî çareser biko, yan zî rayîrê aştîye û sîyasetî biceribno. Wa hukmat fek operasyonanê xo yê leşkeri ra verado.” (Çime: Amida Haber)