Namzetên Serbixwe yên Amedê yên Tifaqa Welatperwer û Demokrat îro bi çerçoveya xebatên hilbijartinê çû serdana Odeya Dikandar û Zinaetkaran a Amedê.

Di şandeyê da digel Namzetê Serbixwe yê Şaredariya Bajarê Mezin a Amedê Saît Aydogmuş, yê Peyasê Zekî Ekîncî, yê Rezanê Hîdayet Fîdan û Yenîşehrê Ramazan Kahramaner, Cîgirê Serokê PSKê Hasan Dagtekîn û Endamên KBNyê yên PAKê Nezîhe Karahan û M. Alî Yilmaz jî pê re bûn.

Di hevdîtinê da Saît Aydogmuş behsa projeyên xwe kir û ragihand ku pirrengîya ku di salên 70yî da hebûn aniha nîne û got em bi ser nekevin jî çima ku vê pirrengîyê cardin li sîyaseta kurdî zêde kiriye, em kêfxweş in.

Hasan Dagtekîn jî behsa armanca vê Tifaqê kir û got em yekrengîya sîyasetê qebûl nakin ku zirarê dide me.

Serokê Odeya Dikandar û Zinaetkaran a Amedê Alîcan Ebedînoglu jî anî zimên ku sîyaseta xendekan zirarê gihandîye me û partiya ku îdia dike kurdan bi tena serê xwe temsîl dike, ne xwedîyê helwesteke demokratîk e û gelê kurd zirarê ji vê sîyasetê dîtiye. Herwiha Ebedînoglu got ne xendek, ne qeyyûm, xelk van herduyan jî heq nake.