Şîyayîşê ey ser ra 37 serrî vîyartî

Şîyayîşê ey ser ra 37 serrî vîyartî

.

A+A-

Yılmaz Guneyî qedero ke kurdan rê ferz ame kerdiş red kerd. Ey pê cuye û hunerê xo no nîşanê dinya kerd û vat: ''Dej, zulm, xizanî, gonî û hêsirî qederê kurdan nîyê. Ma nê qederî nêşinasnenê!''


Yilmaz Guney 37 serrî verî sey sînemawanêko kurdî dinyaya xo bedilna. Ey heta roja xo ya peyêne zî filmê xo viraştî û xo ver da. Surgun de o zêdêr kurdayetîya xo hesîya. Ey semedê rêxistinîya kurdan xîret kerd, semedê ronîyayîşê dezgehanê kurdan ked da. Ey waşt sey rejîsorê kurdî biewno dinya ra û dinya wina bişinasno.

Meseleya kurdan da nîqaşkerdene

Guneyî vatêne ''Ewro pê fîlmê 'Rayîr' meseleya kurdan her cayê dinya de yena nîqaşkerdene.'' Fîlmê Rayîrî (Yol) Festîvala Fîlman a Cannesî de xelata 'Palmîyeya Zerdîne' girewte.No semedê kurdan serberzîya tewr pîle bîye. Viraştişê fîlman semedê ey metodêkê têkoşînî û xoverdayîşî bi. Ey vatêne: ''Mi rê viraştişê fîlman metodêkê xoverdayîşî û serewedaritişî yo. Ez bi nê hawayî sere wedarnena.''


Qiseykerdişêkê xo de vano ''Ez rejîsorêko kurd a.'' Ey meseleya kurdan ser o fikrê xo wina eşkera kerdêne: ''Meseleya kurd Tirkîya û Rojhelatê Mîyanênî de mefteyê şorişî ya la çepê tirkan pê qurretîye nêzdîyê na mesele beno. Ê vanê eke ma şoriş bîyarê ca ma do heqanê kurdan bidê. La kurdî qederê xo bi xo do bewlî bikerê. Eke çepgîranê tirkan bawerî bidêne şarê kurdî înan sere nêwedaritayêne û xo rêxistin nêkerdêne.''

Ma zaf erey mendî

Serra 1983î de Fransa de 'Enstîtuyê Kurdan ê Parisî' abeno. Guneyî nê akerdişî de qisey kerd û vat: ''Qey dezgehêkê winasênî ma zaf erey mendî. Eke sibaroj dewletêka xosere ya kurdan awan biba na xebate ci rê do biba mîsalêk. Ganî kurdî tarîx, kultur û hunerê xo cibigêrê û belge bikerê. Ganî no wezîfeyê ma yo sereke bibo.''

Embazîya Guney û Qasimloyî

Guney surgunîye de hunermend û sîyasetmedaranê kurdan reyde beno şinasî. Nînan ra tay kesî Cegerxwîn, Evdirehman Qasimlo, Mahmûd Baksî, Kendal Nezan û Şivan Perwer ê. Guney o çax wazeno Evdirrehman Qasimlo de Rojhelatê Kurdîstanî de fîlmêk virazo la emrê ci qîm nêkeno. Qasimloyî zî tim waştêne paştî bido hunermend û nuştoxanê kurdan. Qasimloyî semedê Guneyî vatêne: ''Fîlmê to û sînemaya to kurdan rê şansêko pîl ê, ganî ma na çeke bixebitnê. Têkoşînê to bi 10 hezar pêşmergeyan, mîyanê 10 serran de zî ez nêeşkena bikera.''

Ey serra 1984î de na roje Paris de dinyaya xo bedilna.

Nûçeya berê û ya piştre

NÛÇEYE ŞÎROVE BIKE

BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin