Hêzanê Kede û Demokrasî yê Dêrsimî tabelaya ke Wekîlê CHPyî Gursel Erolî verî Jîyargeyê Fatma Ana de aliqnabî dima zî  neçare mend de wedarno  rexne kerde û ard ziwan ke beyanê ey 'hayîya mi pê çinbî' raşt nîyo.

Çend rojî verî Dêrsim de Jîyargeyê Fatma Ana de Wekîlê CHPyî Gursel Erolî binê nameyê 'peyzajî' de restoraston dabi viraştene dima zî tabelaya bi nuşteyê 'Hetê Wekîlê Xarpêtî Birêz Gursel Erolî ra ame viraştene' daliqnabî. 

Nêrazîbîyayîşanê şar û dezgehanê elewîyan ra dima Erol neçare mend de tabela wedarno û îdîa kerd ke 'hayîya ci pê tabela çinbî, ey çîyo winasên nêwaşto.'

Hêzanê Kede û Demokrasî Erol jîyarge de protesto kerd. Xeylêk kesî tewrê protestoyî bîyî.  Sekretera Rêxistinîye ya Komeleyanê Elewîyan ê Demokratîkan (DAD) Reyhane Kumru îfade kerd ke beyanê Erolî raşt nîyê û vat: ''Texrîbato ke Çimeyanê Munzurî de amebi kerdene Fatma Ana de zî ame kerdene.

 Goreyê ma raşt nîyo ke cayê bawerîye bibê malzemeyê reklam û betonî. Ganî hetkarîyanê semedê nê cayan de nameyêk nêvejîyo ver û xebatanê winasênan de ganî verî rizaya şarî bêra girewtene. Erolî xeylêk cayanê Dêrsimî de wina 'îmzayî' verdayî. Çira o cayanê bawerîye keno malzemeyê reklamî?''