Serokê CHPê Kemal Kiliçdaroglu radigihîne, Şaredariya Stenbolê ji bo fêrkirina zimanê Kurdî mamosteyên Kurdî werdigre.

Serokê CHPê Kemal Kiliçdaroglu li Stenbolê di bernameyeka Platforma Parêzvanên Maf de bi mamosteyên Kurdî re hat ba hev û ragihand: Edebiyata Kurdî edebiyateke bêhempa ye û çand û zimanê Kurdî gelek dewlemend e. 

Kiliçdaroglu got, mirov dikare Pirsa zimanê dayikê çareser bike û ev mafekî xwezayî ye. Ger hikûmet wê pirsê çareser neke û derfeta kar ji bo mamosteyên Kurdî çêneke, ewê çareser bikin û li şaredariyan kar bidin wan.

Serokê CHPê diyar kir, ewê di banê Şaredariya Stenbolê de dersên zimanê Kurdî bidin û ji bo vê jî Şaredariya Stenbolê dê mamosteyên Kurdî werbigre.

Di proseya hilbijartinê de her du namzedên sereke yên Stenbolê ji bo ku piştgirîya dengdêrên Kurd û HDPê bidest bixin sozên wek vekirina kursên zimanê Kurdî dabûn û niha çavê sazî û komeleyên ku li ser zimanê Kurdî dixebitîn jî li ser Îmamoglu ye ku wê soza xwe ya bo Kurdî bîne cîh.