Rojanê Korona de pîrozkerdişê Roşanê Qûrbanî

Rojanê Korona de pîrozkerdişê Roşanê Qûrbanî

Ewro Roşanê Qûrbanî yo. Ez nameyê xo û keyeyê Rûpela Nû ser o roşanê şarê ma yê welatperwerî û roşanê heme misilmananê Kurdistanî û dinya bimbarek kena.

A+A-

 

Enwer Yilmaz

Ewro Roşanê Qûrbanî yo. Ez nameyê xo û keyeyê Rûpela Nû ser o roşanê şarê ma yê welatperwerî û roşanê heme misilmananê Kurdistanî û dinya bimbarek kena.

Roşanê Remezanî qedîya û  ewro semedê misilmanan roşanê diyîn o bimbarek Roşanê Qûrbanî yo. No roşan zî rîyê janê virusê Korona ra bêtehm o. Semedo ke virus hema nêqedîyayo, her roj beno sebebê merdişê hezaran kesan ma xemgîn ê. Gere ma dîqet bike, ma nêrê têhet û nêbê sebebê vilabîyayîşê virusî. Ma hema zî binê karantîna de yê, lazim o ma hem xo, hema dorûverê xo û hem zî welatê xo bipawe.

No virus qasê 6 aşmîyo ke çîyêk de tehm nêverdayo. Virusî ra verê cû zî dinya cayêko weş nêbî xora. Her tewir xirabî, bêedelî, bêhûqûqî û zulum estbi. La virus bîyo sebeb ke çew nêeşkeno birehetî bêro têhet, şêro meymantî û cayêk de sohbet biko. Tikê çîyê qijkekî estbî ke ma pê boya xo verdêne ê çîyî zî destê ma ra rîyê virusî ra şîyî. Tutan (domanan) ra hîna zehmet o demê virusî de cuyayîş. Ne eşkenê pîlanê xo de şîyêk cayêk, ne eşkenê şêrê parkêk û ne zî eşkenê roşanan de xo rê şekir arêbidî û mirda xo bigeyrê. Tabî tutê ke dewan de yê gorê tutanê ke şaristanan de yê ra avantajin ê. Xora şaristan sey hepsî yo hînî. Her ca padaye û beton... 

Qijtîya mi de yeno mi vîr ma keyeyê datê xo Hecî Ezîzî de amêne pêser. Keyeyê ey semtê Dîyarbekirî Şehîtlix de bi. Ma ewilî şîyêne goristanê Berê Mêrdînî dima ra uca ra şîyêne keyeyê ey. Dewijê ma pêro kom-kulfet uca de bî. Keyeyê ey xişn bi. Ca dîyêne her kesî. 30 serrî verê cû Dîyarbekir qij bi. Tena mîyanê Surî û şehîtlix estbi. Şehîtlix o wext semtêko luks bi û tena uca de bînayî estbî. Ma werdê xo werdêne û dima heta şan keyeyanê merdimê xo zîyaret kerdêne.

Dima ra şaristan bi pîl her kes şi hetêk. Nika ti vajî ez keyeyan bigeyrî 4-5 roj ti nêeşkenî bigeyrî. Xora keyeyî zî bîyî zaf. Wexto ke merdim ewnîyeno peyê xo, qijtîya xo her çî weş yeno û merdim bêrîya ê rojan keno. Nika merdimatî, biratî û hevaltî derb girewta û kes kesî nêperseno. Her kes kewto îdareyê xo ver û her kes yan keno ke miqatê keyeyê xo bo yan qezenckerdişê pereyan dima yo. Semedo ke roja ma ya ewroyî de ê ke wayîrê pereyan ê û qîmetê înan ‘berz’ o coka milet wina keno yan wina fikrîyeno. Ez wina nêfikrîyena la hetêk ra zî ez qebûl kena ke raştîya ma wîna ya.

Coka têhetameyîş, yewbînî perskerdiş zaf çîyê muhîmî yan qîmetînî nîyê roja ma ya ewroyî de. Şarê ma hetêk ra binê politikaya asimîlasyonî de gan dano hetêk ra zî edetanê xo yê verênan ra durî keweno. Hetêk ra zî merdimatî… Holî, hetkarî û yewbînî perskerdiş qîmet ra kewtê.  Her çiqas zî wîna bo zî ma çîyo ke ma ci rê bawer kenî ra nêvîyarenê. Ma prensîpanê xo, qaydeyanê xo ra nêvîyarenê. Ma xeyalanê xo yê tutî ra, weşî û însanetî ra nêvîyarenê. Merdim pê rengê xo, kulturê xo û însanetîya xo merdim o. Eke ma nê çîyan ra bivîyare o wext mergê ma yo.

Ez newe ra roşanê şarê ma û heme mislimanenê dinya pîroz kena. Ez vana her çî ra ver wa no roşan bibo wesîleyê qedyayîşê virusê Korona, azadîya şarê ma û heme şaranê bindestan. Roşanê şima pêrune bimbarek bo.

 

Ev nûçe 530 caran hatiye xwendin
Nûçeya berê û ya piştre

NÛÇEYE ŞÎROVE BIKE

BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin