"Pêwîstî bi sererastkirina neheqiya dîrokê heye"

"Pêwîstî bi sererastkirina neheqiya dîrokê heye"

Komeleya Nivîskarên Kurd li Swêdê bi nameyan ji bo Serokê Herêma Kurdistanê û Serokwezîrê Herêma Kurdistanê piştgiriya xwe ji bo Serxwebûna Kurdistanê diyar kir

A+A-

Di nameya ji bo Serokê Kurdistanê de Nivîskarên Kurd li Swêdê diyar dikin: Birêz serokê Kurdistanê, Komeleya me hewildanên tevgera neteweyî, hukumeta Kurdistanê û cenabê we yên ji bo serxwebûna Kurdistanê, weke hewildanên sererastkirina dîrokê dinirxîne. Ji ber ku pêwîstî bi sererastkirina vê neheqiya dîrokê heye. 

Nameya Komeleya Nivîskarên Kurd li Swêdê :

Serokê Kurdistana Federal, birêz Mesud Berzanî

Rewşa navneteweyî û neteweyî ya Kurdistanê kês û firsendên zêrînî radestî neteweya Kurd dike. Ev kês û derfetên hêja rê li pêşîya serxwebûna başûrê Kurdistanê vedikin. Îro başûrê Kurdistanê ji her demê bêtir nêzîkî serxwebûnê ye.

Serxwebûna Başûrê Kurdistanê wê bibe destkeftî û serbilindîya hemû Kurdistanîyan û wê xebat û tekoşîna ji bo mafên neteweyî, demokrat û serxwebûna beşên din yên Kurdistanê jî bihêztir bike.

Komeleya Nivîskarên Kurd li Swêdê bi hemû vîn û hestên xwe, piştgirîya tekoşîna doza neteweyî, demokratîk û serxwebûna Kurdistanê dike. Di vê çarçeweyê de, em xebat û hewildanên tevger, desthilatiya Kurdîstana Federal û cenabê we ya ji bo serxwebûna başûrê Kurdistanê gelekî bi nirx û pîroz dibînin; herweha em bi hemû hêz û hestên xwe piştgirîya vê xebat, têkoşîn û hewldanê dikin.

Birêz serokê Kurdistanê

Komeleya me hewildanên tevgera neteweyî, hukumeta Kurdistanê û cenabê we yên ji bo serxwebûna Kurdistanê, weke hewildanên sererastkirina dîrokê dinirxîne. Ji ber ku pêwîstî bi sererastkirina vê neheqiya dîrokê heye. Neteweya Kurd bi serxwebûna Kurdistanê, dê vê neheqî û nexşeya ku li dijî îradeya miletê Kurd pêk hatiye biguherîne. Kurdistana Federal ji nuha ve, ji bo neteweya Kurd û kêmneteweyên Kurdistanê mizgîna dewlet û civatek pirreng, pirdeng, pirkulturî û pirolî ye.

Em hêvîdar in ku, ev hewldanên ji bo serxwebûna Kurdistanê bi hevkarî û yekgirtina neteweya Kurd li başûrê Kurdistanê bi encam bibe. Ji ber ku îro pêdivîya neteweya Kurd ji her demê bêtir bi hemahengîyeke yekgirtî heye.

Neteweya Kurd li welêt û li derveyî welêt, bi kelecanek mezin li benda îlankirina serxwebûna başûrê Kurdistanê ye.

Bi hêviya serxwebûna başûrê Kurdistanê ji bo hemû perçeyên Kurdistanê bibe destpêka welatekî serbixwe, miletekî azad û civateke demokratîk, di xebat û têkoşîna we ya di vî warî de serkeftinê dixwazin û li benda mizgînek pîroz in!

Bijî xebat, têkoşîn û hewildanên ji bo serxwebûna Kurdistanê!

Bijî Kurd û bijî Kurdistan!

 

Komeleya Nivîskarên Kurd li Swêdê

Nûçeya berê û ya piştre

NÛÇEYE ŞÎROVE BIKE

BALKÊŞÎ: Şîroveyên ku têde; çêr, heqaret, hevokên biçûkxistinê û êrîşa li ser bawerî, gel û neteweyên din hebin, dê neyêne erêkirin.
JI kerema xwe re şîroveyên xwe jî bi gramera kurdî ya rast û tîpên kurdî binivîsin