PAK (Partîya Azadîya Kurdistanî), PSK (Partîya Sosyalîst a Kurdistanî), TDK-TEVGER (Tevgera Demokratîk a Kurdistanî) semedo ke hetê Dewleta Îranî ra kişyayîşê kênaya Kurde Jîna Emînî û 30î ra zêdêr xoverdayoxan protosto bikê û hetkarî bidê şarê ma yê Rojhilatê Kurdistanî do Amed de roja şeme, 24.09.2022 bi hawayêko girseyî beyanatê çapemenîye tertîp kerd.

Rayber û endamê PAK, PSK, TDK-TEVGERî, beşdarê kombîyayîşê çapemenî bîy.

Kombîyayîşê çapemenî saete.11.00ê de, Parka Koşûyolû ya Amedî de, verê Peykerê Heqanê Merdiman de ame dayene.

Destpêkî de Hetkarê Serekê Pêroyî yê PSKyî Bayram Bozyelî derheqê armancêna çalakîye de qiseykerdişêk kerd.

Badê cû nameyê PAK, PSK, TDK-TEVGERî ser ,Hetkarê Serekê Pêroyî yê PAKî Vahît Aba beyanato wetax wend.

No zî beyanato wertax o:

Ma hetkarî danê serehewanayîşê şarê xo yê Rojhilatê Kurdistanî! 

Şarê ma yê Rojhilatê Kurdistanî reyna vera zilm, zordarî û dagirkerîya Dewleta Îranî sere hewanayo. Serehewanayîşê şarê ma yê Rojhilatê Kurdistanî nika xeylê şaristananê Îranî de zî veng dayo û bîyo serehewanayîşê şaranê  Kurdistanî û Îranî

Kênaya Kurde ya 22 serrî Jîna Emînî roja 13ê êlûla 2022yî Tehran de hetê polîsanê Dewleta Îranî ra, bi bahaneyê porê aye asîyeno, amey destbend kerdene. Polîsanê Dewleta Îranî Jîna Emînî rê îşkence kerd û bi ê halê îşkencekerdî teslîmê keyeyê aye kerd. Keça kurde roja 16.09.2022 dinyaya xo bedilna.

Kişyayîşê Jîna Emînî ra dima, Merkezê Hemkarîye ya Partîyê Kurdistanê Îranî, semedo ke kişyayîşê kênaya kurd Jîna Emînî protesto bikê, veyna şarê ma yê Rojhilatê Kurdistanî ke wa roja 19.09.2022î dikananê xo anêkerê û heme cayanê karî de greva pêroyî bêra îlankerdene.
Roja 19.09.2022yî, xeylê şaristananê Rojhilatê Kurdistanî de, bi beşdarîyêka pîle şarê Kurdistanî beşdarê greva pêroyî bi; dikanê xo qefelnay, nêşîy kar. Greva pêroyî ya şarê ma yê Rojhilatê Kurdistanî, nîşanê hest, hişmendî û yewitîya neteweyî ya. Ma hetkarî danê greva pêroyî yê şarê xo yê Rojhilatê Kurdistanî.
Heto bîn ra zaf şaristananê Rojhilatê Kurdistanî de, bi beşdarîya deshezaran kesan şarê ma yê Rojhilatê Kuridistanî xoverdayîş mîyan de yo û Rejîmê Îranî protesto keno. Protestoyê Rojhilatê Kurdistanî xoverrodayîş û serehewenayîşêko newe yo; nîşanê bîyayîşêko newe, nîşanê rîpelêko newe yo. Nika protestoyî, Rojhilatî ra vilayê zaf şaristananê Îranî zî bîyê.
Protestoyê vera kişyayîşê kênaya kurd Jîna Emînî  de destpêkî ra hetanî nika, netîceyê hêrîşanê hêzê emnîyetî yê Dewleta Îranî de  30î ra zêdêr kesê sivîlî hetê hêzê Dewleta Îranî ra ameyê kiştene û bi desan kesî birîndar bîyê û bi desan kesî zî ameyê destbend kerdene.
Ma hetê Dewleta Îranî ra kişyayîşê Jîna Emînî û kişyayîşê 30î zêdêr kesanê sivîlan, birîndarketdiş û destbendkerdişê hezaran çalakvanan şermezar kenê.
Ma veng danê heme kurd û kurdistanîyanê dinya ke wa her perçeyêkê Kurdistanî de, dinya de, her cayo ke tede ciwîyenê de, hêzê xo bikê yew û bi çalakîyanê cîya bi cîya hetkarî bidê şarê ma yê Rojhilatê Kurdistanî.
Ma veng danê pêrûna rêxistinanê pawitoxanê heqanê cinîyan, rêxistinanê heqanê merdiman, Netewê Yewbîyayî, Yewitîya Ewropa û heme kurd û kurdistanîyanê dinya ke wa kişyayîşê kênaya Kurd Jîna Emînî, kişyayîşê 30 kesanê sivîlan, birîndarkerdiş û tepişyayîşê hezaran çalakvanan şermezar bikê û vera Dewleta Îranî helweste bigîrê.
Bimiro zordestî û dagirkerîya Dewleta Îranî!
Biciwîyo Azadî û Xelasîya Kurdistanî!
 
24.09.2022
 
PAK (Partîya Azadîya Kurdistanî)
PSK (Partîya Sosyalîst a Kurdistanî)
TDK-TEVGER (Tevgera Demokratîk a Kurdistanî)