Merkkezê Xeberan- Serekê Pêroyî yê PAKî Mustafa Ozçelîk emşo (14.10.2019) Studyoyê Hewlêrî de beşdarê programê DÎVÇÛNî yê Kurdistan TV bi.

Ozçelîkî program de eleqe ant Rojavayê Kurdistanî û telûkeyo ke şarê Kurd mîyan de yo û waşt wa hêrişê Tirkîya bêrê vindarnayene. Ozçelkî pêameyîşê rejîmê Sûrîya û QSD ser o zî va: “Dewleta Tirkîya wazena gorê programê xo şoro la no senî bo hema zî bewlî nîyo. Pêameyîşê HSD û Şamî do vernîya nê hêrişan bigîro.”

Ozçelîkî dewamê qiseykerdişê xo de wina va: “Dewleta Tirkîya seba çi meqsedî nê hêrişî daya dest pêkerdiş.? Bi zelalî serekomarê Tirkîya Erdogan îzeh keno. Vamo: Na xeletîya ke ma verê cû  vakurê Iraqî de kerda, ma do vakurê Sûrîye de newe ra nêke. Yan zî vaşurê Kurdistanî de îxtîdarêk, statuyêk esta. Erdogan vano, ma xeletî kerd ke ma vernîya ci nêgirewt û dewletêk amey ronayîş. Vano, ma do nêevrde Rojavayê Kurdistanî de çîyêk bibo. Esasê hêrişê Tirkîya no yo.”

Ozçelîkî derheqê partîyanê Rojavayê Kurdistanî de zî va: 6 rojîyo ke hêrîşê Tirkiya dewam keno û partîye Rojavayê Kurdistanî hema zî nêameyê têhet, rayêkê çareserî hadre nêkerdê. Ozçelîkî va “ma zaf rey venga YPG û TEV-DEM da ke wa mutabaqatê Hewlêrî û Dihokî bîyarê ca. Qederê Rojava nê mutabaqatan de yo. Ganî partîyê Rojavayê Kurdistanî biamêne têhet, mutabaqatê Hewlêr û Dihokî hetê îdarî û sîyasî de biardêne ca.”

Ozçelîkî  dewamê qiseykerdişê xo de venga netewê Ewropa, Emerîka, Rusya da û waşt wa hêrişanê Tirkîya vindarnê.