Emîne Şenyaşara ke merdimê ci hetê Îbrahîm Halîl Yildizê AKPyîjî ra Pirsûs de kişîyayî, lajê xo reyde verê edlîyeyê Riha de nobeta edaletî rê dewam kena.

Qezaya Pirsûsî ya Riha de wextê weçînayîşanê 2018î de 24ê hezîrane de pawitoxanê Wekîlê AKPyî Îbrahîm Halîl Yildizî û merdimanê ci hêrişê keyeyê Şenyaşarî kerd. Hêriş de ke nêweşxane de zî dewam kerd mêrde û lajê Emîne Şenyaşar kişîyayî. Waştişê pêvînayîşî yê dosyaya dewaya Şenyaşarî hetê serdozgerîye ra nêame qebulkerdene. Roniştişê dewaya Şenyaşarî 12ê adare de Mehkemeya Cezaya Girane ya Meletî de do bêro vînayene.

Emîne Şenyaşara ke 2 lajê ci û mêrdeyê ci verê çimanê ci de kişîyayî lajê xo Ferît Şenyaşarî reyde pê waştişê edaletî verê edlîyeyê Riha de çalakîya roniştişî rê dewam kena. Çalakîye vizêr dest pêkerdbi.

Ferît Şenyaşarî eşkerayîye daye endamanê çapemenîye û vat: ''Heta ke kiştoxî nêrê tepiştene ma do çalakîya xo dewam bikerê.''

Ferîtî ard ziwan ke înan waşt serdozger bivînê la waştişê înan ame redkerdene û vat: ''Heta ke ma netîceyêke bigêrê tîya de ronişê.''