Merkezê Xeberan

Goreyê raporê KCDPî menga Êlule de 53 cinîyî hetê camêrdan ra ameyî qetilkerdene.

Platformê Ma Do Qetilkerdişê Cinîyan Vindarnê (KCDP) raporê şîdetê vera cinîyan ê menga Êlule eşkera kerd.

Goreyê raporî mengêk de 53 cinîyî ameyî qetilkerdene. Mergê 11 cinîyan sey mergê bişikî ame qeydkerdene û sebebê mergê 31 cinîyan zî nêame tesbîtkerdene.

Rapor de ame vatene ke zafê cinîyan hetê mêrdeyan û merdimanê xo yê camêrdan ra ameyî qetilkerdene.

Reyna ame vatene ke  heta ke sebebê qetilkerdişî û hetê kamî ra ameyî kiştene nêrê zelalkerdene û qetilkarî nêrê cazekerdene cinîyan rê şîdet do dewam bikero. Goreyê raporê peyênî yê KCDP’yî emser pêroyî de 354 cinîyî ameyî qetilkerdene. Na hûmare têna qetilkerdişê ke ameyî eşnawitene. Beno ke na hûmare ra hîna zafêr cinîyî ameyî qetilkerdene.